攰，就唞下啦

　　唉，就系因为持住年轻体格好，就随意任意体力透支，对身体健康造成危害同威胁咯。我哋常日讲：要注意劳逸结合，早睡早起身体好。实际上，有几个能够真正做到得嘎？

　　冇有使惊？你坚过石坚噉话啊？咪下巴轻轻吹水唔抹嘴啦。冇病冇痛嗰阵，个个都话可以老虎打死十几只嘎啦。濑嘢嗰阵，就冇得你讲嘢。

　　各位大哥大姐小哥哥小姐姐，好心你哋生性啲啦，你阿妈冇教落咩：“身体系革命嘅本钱！”后生又点嘛？后生嘅本钱只系有限公司嚟啫，后生的确系本钱，但系，如果将啲本钱耗尽呢？噉就自然又穷又燶嘎啦。有好嘅体质好嘅体魄，固然间好，如果不懂珍惜，肆意糟则自己，噉摧残法，催催下就真系残嘎啦。捱坏咗，就算唔死都一声潺啦。

　　

　　常日捱夜，疲劳过度，熊猫眼都出晒来，都继续任性。直至搞出人命，呜呼哀哉，勤力做嘢嗰啲，就叫过劳死；噉通宵玩机晚晚饮醉夜夜笙歌嗰啲呢，吃喝玩乐去到尽，应该叫咩啊？“过乐死”？咁后生，大把青春，大把世界，就系要玩命，就要唔要命，结果呢，趴低咗就再都醒唔翻咯，真系唔抵——唔抵可怜啊。

　　所以话呢，好多做人嘅基本道理，要懂，要做，先至系对自己对家人负责嘅表现。好简单啫：饿，就要食嘢。饿，就要医肚。攰，就唞下啦。攰，就放低啲嘢，唞唞先。乜，好难做到咩？明明可以做到，就系唔做，攰归攰，就系坚决唔唞，噉叠加起来，攰上加攰，百上加斤，攰攰都冇咁攰，攰攰攰攰攰，攰到极点攰到极限，你话会点呢？机器不停运转，都要关闸关机唞下畀佢散热啦，唔通由得部电机发热烧焦嘞啵？！

　　讲到呢度，就顺便讲下粤语当中嘅“攰”和“唞”呢两个字。首先，攰（gui），系咩状态呢？“攰”是“累”的意思。“攰”表示“疲累”，从字形看，可以理解为透支了力气，精疲力尽。“攰”的常见用法有：好攰（好累）、攰死（疲倦透顶）、攰到死（精疲力尽，疲惫不堪）、呻攰（叫累）、攰赖赖（累累累）、攰到呕（累到想吐）、攰到脚软（累到腿软）、攰到瞓地（累到睡地上）、攰到趴係度（累到趴下）、攰到扁晒嘴（累到噘着嘴）、攰到好想喊（累到很想哭）、攰到冇声出（累到不想说话）、攰到只狗噉（累到像一只小狗）、攰到只卒噉（累到像牛马兵卒）、攰到只蕉噉（累到像条蕉伸不直）、攰到嗌顶唔顺（累到嚷顶不住）、攰到唔想理你（累到不想理睬你）、攰到冇力气冲凉（累到没力气洗澡）

　　例句，比如话：“翻咗五日工，成个人感觉好攰，今日终于可以休息下。”（上了五天班，整个人感觉很累，今天终于可以休息一下。）“行咗咁耐，你攰唔攰啊？”（走了这么久，你累不累呀？）“行到攰攰哋，最啱食个糖水嘞，前面坐低啦。”（走得有点累了，最适合吃糖水，到前面坐下吧。）“哗，今日攰到连坐喺度剪发都会训瞓着。”（哇，今天累得坐着理发都睡着了。）“呢条友攰到通街瞓马路坑渠边，攞啲烂水马、纸皮箱垫住当枕头喔。”（这个家伙累到在街边在水渠边睡马路，拿那些破水马、纸皮箱叠起来当枕头来用哦。）唞（dou），意为歇，休息。“唞”的常见用法有：唞一阵（歇一会）、唞阵间（歇会儿）、唞阵先（先歇会）、唞一唞（歇一歇）、唞气（呼吸）、早唞（早点睡/早点休息/晚安）、唞几耐（休息多久）、唞几日（休息几天）、走夹唔唞（拼命地跑）。例句：“食完饭，唞翻下”（吃了饭休息一下。）“系噉做，系噉做，想做死人咩？吊颈都要唞气啩？”（这样一直做，一直做，想做死人吗？上吊也要休息一下透透气吧？）传统嚟讲，广东人不嬲都系好接地气，好务实嘅，知道“功夫长过命，慢慢做”，知道“留得青山在，哪怕冇柴烧”，知道“勤力还勤力，做时做，吊颈都要唞下气”，所以，工作——休息——再工作，系正解，休养生息、养精蓄锐，先至能够再战江湖。根据呢种正面嘅人生信条，系上个世纪80年代，佛山出产的九江双蒸酒，就已经喺香港电视播放广告，啲广告歌朗朗上口，超盏鬼！广告主角同背景就系建筑工地以及码头从事体力劳动嘅工人，代表做粗重嘢嘅劳苦大众。唔知大家仲记唔记得点唱呢？