要嗰样冇嗰样，冇嗰样要嗰样
作者：admin 发表于2022-02-02 11:32 阅读(1)
要嗰样冇嗰样，冇嗰样要嗰样
我不嬲都好惊嗰啲难以伺候嘅人，广州话就形容系“好难服侍”，若然见到噉嘅人，会买佢怕，快快催避开，眼不见心不烦噶。
有一次，三五知己喺间大众化茶楼饮早茶。叫咗烧卖叉烧包糯米鸡食紧，仲煲紧一煲鱼片粥添。
隔咗三张台，有个阿生好似食咗火药噉样，拍到台面蹦蹦响。有个服务员即刻走过去问咩事啦。嗰位仁兄骂骂咧咧响度闹，喝人哋话碗濑粉迟迟未上，嘈住要叫个部长来，嗰边部长前脚啱啱到，呢边炮仗自行点着噼啪响，一下子拗断对筷子掟喺转盘度，一轮嘴破口大骂。
个部长好言相劝，问明原因。冇几耐，有侍应就捧着个托盘送濑粉过来嘞。
“使唔使咁招积霸道，恶死轮登啊？”我哋忍唔住细细声嘀咕吟寻，“人家都系打份工啫，难为人哋有乜谓呢？”“无嗱嗱被佢吓一跳，好似人哋杀佢老窦噉样暴跳如雷喔，真系服得佢好交关。”
以为火气佬消消火消消火，静落嚟啦。点知，呢边我哋仲喺度吐槽嗰条友唔系人噉品，嗰边炮仗又着，呢次响得更犀利，升级版啊。嗰位“咆哮帝”竟然攞只杯掟落地，吹须碌眼好似要食人噉样。唔通呢匀食食下发现有只乌蝇？
“呢次使唔使抛浪头嗌大堂经理过来啊？”话口未完，全中！佢真系发烂渣要经理躝过来噉话。声大夹恶，要全世界腾腾震咩？搞边科啊？
经理过来调解，搞清楚件事，原来系佢话“烧鸭濑粉”唔系“烧鹅濑粉”，仲话啲濑粉系机制，唔系手制，好难食。系摆乌龙揾佢笨喔。个服务员好委屈噉话，有解释过，烧鹅已经卖完，只有烧鸭。系个人客话可以要烧鸭先至叫厨房做噶。嗰位炮仗颈大哥仍然咬硬话自己冇讲过。呢个时候，隔篱台有个阿姨睇唔过眼，就仗义执言话：“我头先都系听见佢话烧鸭，冇所谓嘅啵。”噉都有嘅喔，于是经理就表明，公司嘅原则和规矩，做错嘢，谁错谁负责，谁错处罚谁。话：个客，要么赔偿落地开花打烂咗嘅茶杯同筷子嘅损失，要么就按菜单结账走人，以后光临恕不接待……哦哦，原来系阿大大大~大爷，要嗰样冇嗰样，冇嗰样要嗰样！
嗰位高人，见到自己理亏，气焰即刻熄晒。乖乖哋畀钱埋单，赔钱先至了事。
啧啧，真系唔抵得佢嘞，欺人太甚！分明系睇唔起人哋服务行业，认为自己高人一等，就有风使尽艃啫。有几个臭钱好巴闭咩！呼奴喝婢噉，真系非洲和尚——乞人憎。
睇怕，灰溜溜噉走人，下次都唔好意思再来帮衬嘞啩，我哋唔需要避开佢揾第二间茶楼饮茶啦。
睇来，我哋都系太过天真嘞。过咗一个星期，周末我哋又去饮茶，竟然间发现嗰位威过威士忌嘅大哥，坐正门口嗰位置。你以为尴尬嘅系人哋啊？你唔尴尬，人哋块脸皮仲厚过桩板啦。
不过，呢次佢冇发脾气，冇屈人，冇系威系势噉啦。
作者简介：王小女子，一个从小就热爱文学和音乐的小女子，个人公众号：王小女子（gh-9abf8a3205fe）。