冇人要，阿妈执咗个牙牙仔……
作者：admin 发表于2022-02-02 11:21 阅读(1)
冇人要，阿妈执咗个牙牙仔……
细个嗰阵时，我对鱼塘边缠着长长麻绳嘅老水牛真系又爱又恨。因为我要找寻一个秘密，始终都一无所获咯。
听见隔篱屋阿婶抱住个牙牙仔，净系识喊，块面仲生咗红疹，皱晒眉头好丑样哦，我就问阿妈啦：婶婶生咗个仔噢，阿妈你当初系点样生我落嚟嘎？
点知，阿妈好认真噉话：你系执返来嘎，唔系我生嘎。
我难以置信，就追住问详情啦，阿妈就讲古话：有一日，佢喺鱼塘边洗竹席，见到嗰只水牛好似屎急噉样行来行去，摇头摆尾，跟住就“噗”一声，屁股度喷出一大笃牛屎，然之后听见哇哇嘅哭声。阿妈洗完张席，走过去睇下，原来牛屎里面有个牙牙仔喔，见冇人要咯，咪攞返屋企洗干净啲牛屎啰……吓？我竟然系嗰只“牛妈”疴出来嘎？唔怪之得，我洗身嗰时，会卒出啲老泥臭崩崩啦，原来系啲牛屎味！阿妈即刻接话：系啰，系啰，牛妈好辛苦嘎，要好好待佢啊。
有咗呢个惊天嘅出生秘密，自此之后，我一直都再寻根问底嘞。只系，身世之谜真系好神秘，就心思思想过去同“牛妈”亲近亲近。帮佢赶走啲乌蝇、牛虻啊噉，摘啲新鲜嘅野草畀佢食。知道佢唔识讲人话，就自言自语噉摸住佢嘅牛角话：如果阿妈唔执我，我系唔系要跟住你一齐食草呢？
意想不到，有一日，我一时忘记咗大人平时“唔好畀牛见到红色”嘅教导，着住件红色灯芯绒衫行过去揾“牛妈”，啱啱到佢眼前啧，就无端白事被佢用牛角一下翘起甩出去，差啲就跌落塘。我摔个“饿狗抢屎”，惊魂未定，一起身就喊住急急脚跑返屋企。阿妈问我发生咗咩事。我话牛妈想掉我落水。“牛妈有牛脾气，最讨厌红色吖嘛，下次记得唔好着红色衫见佢啰。”
仲有下次咩？经过呢次惊吓，我真系怕咗牛妈啰，保持距离好啲！挂住佢，就远远望下佢啦。
后尾，偷偷问过几个同村姊妹，答案都系“我妈话我系垃圾桶度捡嘅”，“我差唔几啦，喺垃圾堆度”，“我好似话系蕉田嗰度被阿妈见到嘅”，都系随手执嘅，只系地方唔一样啧。总之，就系乌糟邋遢冇人要嗰只。放心啦，呢个系我哋嘅共同秘密，我哋唔会话畀第个知噶。嗰时，天生纯品，我哋一个二个都唔会怀疑嘅啵——点解有咁多细蚊仔执嘎？
可能系旧时营养跟唔上，所以智商低啦。啲大人常日讲大话，又唔见佢哋掉大牙嘅喔。咩“食豉油会变黑”、“食葱会变聪明”、“食濑尿虾会濑尿”、“利是钱阿妈先帮你袋住”、“吞咗西瓜核，会喺头顶生出瓜苗来”，吓到我每次食有籽嘅嘢，都小心翼翼，机制将啲籽吐出来。又可能说谎说得多嘞，真系有好多大人烂咗大牙，于是就镶金牙啰。
后来，有咗细佬。阿妈又重复“牛屎度捡咗牙牙仔”嘅故事，我细佬眼碌碌笑骑骑话：信你——至奇啊！阿妈，你唔使呃我！明明你去卫生站生我嘅！
嗰阵时，我先至恍然大悟，闹自己死蠢，就信大人唔会讲大话，仲系我细佬有头脑！
原来长到牛高马大，自己相信最久时间嘅谎言系乜嘢？嗰个年代，呢个温柔嘅大话仲系通用版添。做阿妈嘅，惗啲乜嘎？“我从哪里来”呢个问题，好难回答咩？乜话系亲生嘅，好羞家咩？
到咗而家呢个科技信息时代，唔通要呃啲细路仔话：你系充话费送嘅，你个妹系二维码扫出来嘅。噉嘞啵？
作者简介：王小女子，一个从小就热爱文学和音乐的小女子，个人公众号：王小女子（gh-9abf8a3205fe）。